کرکٹ کے شائقین دل تھام کر بیٹھیں۔ انتظار کی گھڑیاں ختم ہونے کو ہیں، کراچی میں کرکٹ کا دنگل آج سجےگا۔
دبئی اور شارجہ میں دُھوم مچانے کے بعد پاکستان سپر لیگ کا میلہ کرکٹ کے دیوانوں کے لیے پاکستان کے اسٹیڈیم میں سج رہا ہے۔ خوبصورتی سے سجا کراچی شہر تماشائیوں کو بھرپور انداز سے ویلکم کررہا ہے۔ پی ایس ایل کے ستائیسویں میچ میں لاہور قلندرز کا مقابلہ اسلام آباد یونائیٹڈ سے ہوگا۔
روشنیوں کے شہر میں پی ایس ایل فور کی روشنیوں نے چار چاند لگا دیے ہیں۔۔ لاہور قلندرز اور اسلام آباد یونائیٹڈ کے کھلاڑی جیت کا عزم لیے نیشنل کرکٹ اسٹیڈیم میں شام سات بجے اتریں گے۔ کرکٹ کے شیدائی اپنے پسندیدہ کھلاڑیوں کو میدان میں کھیلتے ہوئے دیکھنے کے لیے بے تاب ہیں۔۔ نیشنل اسٹیڈیم کراچی میں آج سے چوکوں اور چھکوں کی برسات ہوگی۔
بلے باز دکھائیں گے اپنے بیٹ کی طاقت اور باولرز بھی مخافل ٹیم کی وکٹیں اڑانے کو تیار ہیں۔ کرکٹ شائقین اسٹیڈیم میں خوب ہلہ گلہ کریں گے
پاکستان پُرامن ہے۔۔ غیر ملکیوں کے کے لیے محفوظ ہے۔۔ کراچی کے چوک چوراہوں کو میگا ایونٹ میں شریک ملکی اور غیرملکی کھلاڑیوں کے پوسٹرز سے سجا دیا گیا ہے۔
شہر قائد کے خوبصورت مناظر، اپنے ہیروز کے علاوہ غیرملکی اسٹارز کو خوش آمدید کہہ رہے ہیں۔ پاکستان سپرلیگ کا آغاز چودہ فروری سے یو اے ای میں ہوا، چھبیس میچز دبئی اور شارجہ میں کھیلے گئے۔
