پاکستان پیپلزپارٹی پارلیمنٹرینز کے صدر آصف علی زرداری کو سینیٹ ، قومی اسمبلی اور صوبائی اسمبلیوںنے بھاری اکثریت سے صدر پاکستان منتخب کرلیا- وہ دوسری بار صدر بننے والی پہلی سول شخصیت بھی بن گئے۔
قومی اسمبلی، سینیٹ اور چاروں صوبائی اسمبلیوں میں صدارتی انتخاب کیلئے ووٹنگ ہوئی اور ارکان نے صبح سے 4 بجے تک اپنا حق رائے دہی استعمال کیا۔
صدارتی انتخاب میں حکومتی اتحاد کے امیدوار آصف علی زرداری جبکہ اپوزیشن کی جانب سے محمود خان اچکزئی کے درمیان مقابلہ تھا-
پارلیمنٹ میں ارکان قومی اسمبلی اور سینیٹرز نے اپنا ووٹ کاسٹ کیا اور ہر رکن کا ایک ووٹ شمار ہوا۔
یہ بھی پڑھیں: پی ڈی ایم نے ایک ماہ تک حکومت کو مستعفی ہونے کی مہلت دے دی
حکمران اتحاد کے امیدوار آصف علی زرداری بھاری اکثریت سے صدر منتخب ہوگئے، انہوں نے پارلیمنٹ سے 255 ووٹ لیے جبکہ سنی اتحادکونسل کے محمود خان اچکزئی 119 ووٹ حاصل کرسکے۔
پارلیمنٹ میں ڈالے گئے ووٹوں میں سے ایک ووٹ مسترد ہوا۔
یوں مجموعی طور پر قومی اسمبلی، سینیٹ اور چاروں صوبائی اسمبلیوں سے آصف زرداری 410.777 الیکٹورل ووٹ لیکر صدر پاکستان منتخب ہوئے جبکہ محمود خان اچکزئی نے 180.34 الیکٹورل ووٹ حاصل کرسکے۔
آصف علی زرداری دوسری بار صدر منتخب ہوئے اور وہ پاکستان کے 14 ویں صدر ہوں گے۔ آصف زرداری 2008 سے 2013 تک صدارتی منصب پر فائز رہ چکے ہیں۔
